ab Piya hi Piya rahe bas,

Maya dekh ke aayi rooho ko Piya Arsh ka sukh de rahe hain. Moolmilave me pyaar bhari baate aur dher saari haansi majak karke jab Piya rooh ko leke Moolmilave se nikalke Arsh ka sair karane nikle to rooh khusi se jhoom uthi. Ab ki baar ki khushi ka koi thikana nahin. Kyon ki, rooh ye jaan gayi ki ye Dhaam asal me Dhani ka dil hi hain. Har kan kan me Piya hain. Dhani apne ishq ke karan hi karodo saroopse rooh ko sukh de rahe hain. Ab to rooh bhi itrati huwi chalne lagi, ishq se sarabor, halke kadamse mast chaal se.

Sidhiyan chadhake Piya rooh ko dooji bhom le chale. Hire jaise pardarshi divaal, thamb, farsh, chandrava wale 12000 mandiro ke taraf ishara karte hain Piya. Rooh pulkit ho gayi. Dhani ne kaha, Sakhi, chalo ek khel khelte hain. In mandirome pravesh karen, aur tum mujhe pakadke ang lagalo to jeet tumhari. Rooh raaji huwi aur in mandirome pravesh kiya.

Andar se dekhne par in mandiro ki alag hi sobha hain. Har chij pardarshi aur chamkeele. Ek hi sakhi ke anant pratibimb. Farsh-chandrava-dival har taraf chalte-bolte pratibimb. Rooh ko kahin Dhani dikhaai dete hain, wo doudi chali jaati hain lekin waha to divaal hi milta hain. Mandirke bichse dekhe to ye lagta bhi nahi ki dival, farsh, chandrava wagera hain. Bas har taraf pratibimb dikhaai de rahe hain. Har pratibimb pyaar se pukaar rahe, har pratibimb noor bhare. Rooh iss sobha me kuchh aise kho gayi ki khud ko bhool gayi.

Aise me rooh ko Dhani apne najdik dikhaai diye. Rooh unki aur badi jaa rahi thi ki rooh ki nazren piya ke pratibimb ki nazrose mili. Rooh kuchh aise doob gai ki khud ko bhool gayi.

kabhi aise khelme gayi thi rooh, jahan Khuda ko bhooli baithi thi
ab aise khel hain Arsh ke, rooh Khuda me khud ko bhool gayi

jab saamne Dhani chal diye, rooh chounk ke uthi aur muskaate huwe fir se Piya dhoondne lagi. Nigaho se jo khumaar piya tha, usi mastime doobi huwi rooh khelme magan Dhani ko dhoondti rahi. Chhaliya, kabhi dikh bhi jaate to nazre mila ke chaal kar lete aur rooh besudh ho jaati.

Pehro ye anand ki leela karne ke baad jab Dhani ne aawaz diya aur pichhe se aake rooh ke haat pakad liye, tab kahi jaake rooh Piya se mil saki. Piya aur rooh muskaate huwe ek duje se mile. Fir Dhani ne rooh ke haat pakadke Bhulvani ke mandiro se nikala aur chabutre ki sobha dikhate huwe Khadokli ki taraf le chale. Pyaar bhari baate aur jhilna singaar karke Piya rooh ke paas baithe. Rooh apne Dhani ki sobha, unke nazro ki jaam aur dilme umadte Ishq ki lehrome aise kho gayi ki Dhani me hi samaa gayi. Uski haal kuchh aisi ho gayi, na wo bol saki na kuchh soch sakti, 
ab Piya hi Piya rahe bas, rooh to kahin nahi